შოკისმომგვრელი ამბავი — ყალბი ბილეთი, ჩაშლილი ბიზნესშეხვედრა და ფრაზა, რომელმაც ყველა გააოცა: „პოლიციის ძალა ჩემამდე ვერ მოვა!“

საგარეჯოს მუნიციპალიტეტში მცხოვრები ოჯახი თბილისი – ბაქოს მატარებლის ბილეთის გამყიდველს, ტუნზალა სივრიქაიას თაღლითობაში ადანაშაულებს.

დაზარალებულის განცხადებით, სოციალურ ქსელში შეძენილი ბილეთი ყალბი აღმოჩნდა, რის გამოც ოჯახის წევრს ბიზნეს შეხვედრა ჩაეშალა და დიდი ფინანსური ზარალი მიიღო.

ის ქალს TikTok პლატფორმაზე შექმნილი გვერდის, “Georgian.Travrl“-ის მეშვეობით დაუკავშირდა და ბილეთის საფასური 8 ოქტომბერს გადაუხადა. მატარებლით მგზავრობა კი 15 რიცხვში ჰქონდა დაგეგმილი.

გამგზავრების დღეს სადგურზე მისულმა გაარკვია, რომ მგზავრობას ვერ შეძლებდა, რადგან ელექტრონული ბილეთის QR კოდზე სხვა პირის მონაცემები იყო დატანილი.

როდესაც ქალს პასუხი მოსთხოვა, მან სმს-ი დაუბრუნა, რომ „პოლიციის ძალა ჩემამდე ვერ მოვა“.

ოჯახის ინფორმაციით, გამოძიება თაღლითობის მუხლით დაიწყო. დაზარალებული პირი სამართალდამცავებმა უკვე გამოკითხეს.

მას ხელთ აქვს თანხის გადარიცხვის ქვითარი, სოციალურ ქსელში მიმოწერა და მიღებული ელექტრონული ბილეთი.