სკოლაში ძალადობის ორგანიზების საქმეზე დაკავებული ორი არასრულწლოვნის სასამართლო პროცესი დღეს საქალაქო სასამართლოში გაიმართა. სასამართლომ დააკმაყოფილა პროკურატურის შუამდგომლობა და ერთ-ერთ არასრულწლოვანს აღკვეთის ღონისძიების სახით პატიმრობა შეუფარდა.
- რა ედებათ ბრალად არასრუწლოვნებს
გამოძიების მტკიცებით, ბრალდებულებმა 2026 წლის აპრილი-მაისის თვეში სოციალურ ქსელის მეშვეობით გაიცნეს ერთმანეთი და განიზრახეს სკოლაზე თავდასხმის, რბევისა და ძალადობის ორგანიზება და მასში მონაწილეობა.
“კერძოდ, მათ შეარჩიეს თბილისში მდებარე კონკრეტული სკოლა, შეისწავლეს მისი შიდა განლაგება, გადაწყვიტეს რომ სკოლის წინ დაემონტაჟებინათ ყალბი ასაფეთქებელი მოწყობილობა, რაც საშუალებას მისცემდათ შეუმჩნევლად შეჭრილიყვნენ სკოლაში, დაერბიათ სკოლის შიდა ტერიტორია და იარაღის გამოყენებით სკოლაში მყოფი პირებისთვის მიეყენებინათ ჯანმრთელობის დაზიანებები.ამ მიზნით მათ შეიძინეს სხვადასხვა ნივთები და შექმნეს ყველა პირობა დანაშაულის ჩასადენად, თუმცა განზრახვის სისრულეში მოყვანა ვერ მოახერხეს, რადგან მათი ქმედება გამოვლენილ იქნა სამართალდამცავი ორგანოს თანამშრომლების მიერ.
დაკავებულებს ბრალდება საქართველოს სისხლის სამართლის კოდექსის 18,225-ე მუხლის პირველი და მეორე ნაწილებით (ჯგუფური მოქმედების ორგანიზებისა და მასში მონაწილეობის მომზადება, რასაც თან უნდა მოჰყოლოდა ძალადობა და რბევა, სხვისი ნივთის დაზიანება და განადგურება, იარაღის გამოყენება) წარედგინათ, რაც სასჯელის სახედ ექვსიდან ცხრა წლამდე თავისუფლების აღკვეთას ითვალისწინებს.” – ნათქვამია შსს-ს განცხადებაში.
დაპატიმრებული არასრულწლოვანის ადვოკატის, გია დარჩიას თქმით, ბრალდებული თავს უდანაშაულოდ თვლის. თავად ადვოკატი კი აცხადებს, რომ სამართალდამცავებმა სინამდვილეში ნივთმტკიცებებად ამოიღეს სათამაშო იარაღი და ისეთი ინვენტარი, რომელიც შეიძლება ნებისმიერ ოჯახში ინახებოდეს.
ბრალდებული არ აღიარებს წარდგენილ ბრალდებას და თავს თვლის უდანაშაულოდ. არ ვადასტურებთ, რომ რაიმე ისეთი საგანია ამოღებული, რითაც მსგავსი რამის ჩადენა შეიძლებოდა. ეს გახლავთ სათამაშო ინვენტარი, სათამაშო იარაღები, რომლებიც შეძენილი გახლავთ გასულ წლებში და არანაირ მომზადებასა და ამისთვის რაიმე ნივთების შეძენაზე საუბარი ზედმეტია. ამას დავადასტურებთ გამოძიებასთან, რომ ეს ნივთები შეძენილია წლების უკან. ისინი ერთმანეთს არ იცნობენ, ფიზიკურად ერთმანეთი არ უნახავთ, არაფერზე არ შეთანხმებულან და რაიმე ისეთ გეგმაზე, რომელიც მსგავსი რამის ჩადენის საშუალებას მისცემდა მათ, ასეთ რამეზე საუბარი სისულელეა” – აცხადებს ადვოკატი “ტვ პირველთან”.
რაც შეეხება ბრალდების პოზიციას, პროკურორის განმარტებით, არასრულწლოვნისთვის აღკვეთის ღონისძიებად პატიმრობის შეფარდება აუცილებელი იყო, რადგან საფრთხეები არსებობდა.”არსებობდა ძალიან მაღალი საფრთხე ახალი დანაშაულის ჩადენის, ასევე მტკიცებულებების განადგურების. საქმეზე გამოძიების მიერ მოპოვებული იქნა არაერთი მტკიცებულება, მათ შორის არასრულწლოვანთა მიმოწერა, სადაც ისინი საუბრობენ კონკრეტულ სკოლაში შეჭრაზე და პირთა მიმართ დაზიანების მიყენებაზე. დანიშნულია ბალისტიკური ექსპერტიზა და უნდა დადგინდეს რომელ იარაღს განეკუთვნებოდა ამოღებული ნივთმტკიცება ” – აცხადებს პროკურორი.
ერთ-ერთი ბრალდებული არასრულწლოვნის მამამ “ტვ პირველთან” განაცხადა, რომ ამ ეტაპზე მათ არანაირი დამატებითი ინფორმაცია არ აქვთ მომხდარის თაობაზე.”სანამ გამოძიება მიმდინარეობს მხოლოდ ადვოკატის ჩვენებას ვეთანხმებით. ვერაფერს გეტყვით, სანამ გამოძიება არ დასრულდება, არ ვიცით არაფერი, ჩვენც გარკვევის ეტაპზე ვართ.” – განაცხადა ბრალდებულის მამამ.შენიშვნა: ფოტოზე – ადვოკატი და ბრალდებულის მამა
