მცხეთის რაიონულმა სასამართლომ პროკურატურის მიერ წარდგენილი მტკიცებულებები გაიზიარა და მცხეთის მუნიციპალიტეტში მომხდარი ძალადობის და დამამძიმებელ გარემოებაში მკვლელობის მცდელობის ფაქტებზე ბრალდებული დამნაშავედ ცნო. ინფორმაციას საქართველოს გენერალური პროკურატურა ავრცელებს.
- მათივე ცნობით, სასამართლო პროცესზე გამოკვლეული მტკიცებულებებით დადასტურდა, რომ 2025 წლის 22 მაისს, მცხეთის მუნიციპალიტეტის სოფელ ერედაში, ბრალდებულმა განზრახ მოკვლის მიზნით, განსაკუთრებული სისასტიკით ორ დაზარალებულს ჩაქუჩით სხეულის სხვადასხვა არეში მრავლობითი დაზიანებები მიაყენა და შემთხვევის ადგილიდან მიიმალა.
დროულად აღმოჩენილი სამედიცინო დახმარების შედეგად დაზარალებულების გადარჩენა მოხერხდა. ბრალდებულს ბრალდება საქართველოს სისხლის სამართლის კოდექსის 126-ე მუხლის 1-ლი (ძალადობა) და 19,109-ე მუხლის „ლ“ და „მ“ ქვეპუნქტებით (მკვლელობის მცდელობა, ორი პირის მიმართ, განსაკუთრებული სისასტიკით) წარედგინა.
მცხეთის რაიონულმა სასამართლომ ბრალდებული დამნაშავედ ცნო წარდგენილ ბრალდებაში და სასჯელის სახედ და ზომად 18 წლით თავისუფლების აღკვეთა განუსაზღვრა,“ – აღნიშნულია ინფორმაციაში.
შემზარავი დანაშაული მცხეთის რაიონში, სოფელ ერედაში გასულ წელს მოხდა. თანასოფლელები ერთ-ერთი მეზობლის სახლში იყვნენ შეკრებილები, ამ დროს მათთან მივიდა ასევე თანასოფლელი – 29 წლის მამაკაცი და სუფრაზე მყოფ ორ მამაკაცს ფიზიკურად გაუსწორდა.
ოჯახის წევრი მაშინ ამბობდა, რომ კობა ჭეიშვილს დაზიანებები მიყენებული აქვს ჩაქუჩის და ცულის გამოყენებით.
“მძიმე მდგომარეობაშია მცხეთის საავადმყოფოში. სახის ძვლები აქვს სულ ჩამსხვრეულ, არც ერთი ძვალი არ არის მთელი. გუშინ გაუკეთდა ოპერაცია, მიმდინარეობდა 8 საათი. ექიმმა თქვა, როგორც შევძელით ავკინძეთ ეს წვრილ-წვრილი ძვლებიო, გავაერთიანეთო…
ასე გავიგე, რომ თავდამსხმელს ჰქონდა ჩაქუჩი, სამზარეულოს რაღაცა მოწყობილობა, სახეში აქვს ნარტყამი” – აცხადებდა რესპონდენტი.
