12 წლის მია შეი სენტ-ჰილერი ლონდონში, კაფეში შეკვეთილი მილქშეიკის დალევის შემდეგ გარდაიცვალა.გოგონას თხილზე სიცოცხლისთვის საშიში ალერგია ჰქონდა, თუმცა სასმელი იმავე ბლენდერში მომზადდა, რომელშიც მანამდე თხილის შემცველი კოქტეილი დაამზადეს. ბლენდერი არ გაურეცხავთ, რის გამოც ალერგენის ნარჩენები მიას მილქშეიკშიც მოხვდა.
გოგონა მოგვიანებით დეიდის სახლში შეუძლოდ გახდა და გონება დაკარგა. ის Evelina London-ის ბავშვთა საავადმყოფოში გადაიყვანეს, სადაც ინტენსიური თერაპიის განყოფილებაში მკურნალობდა, თუმცა მისი გადარჩენა ვერ მოხერხდა.
შემთხვევის გამო კაფის ოპერატორმა, ბარი უსელმა, სურსათის უვნებლობის ექვსი მოთხოვნის დარღვევა აღიარა. მას 18 000 ფუნტი სტერლინგის ოდენობის ჯარიმა დაეკისრა და 100 საათის განმავლობაში საზოგადოებისთვის სასარგებლო სამუშაოს შესრულება მიესაჯა. უსელს კაფის მმართველობის და ფლობის უფლებაც ჩამოერთვა.
მიას ოჯახის წევრები მიიჩნევენ, რომ მსგავსი ტრაგედიების თავიდან ასაცილებლად კვების ობიექტებში ალერგენების მართვის წესები უფრო მკაცრი უნდა იყოს.ისინი მოითხოვენ, რომ ჰიგიენის შეფასებასთან ერთად, დაწესებულებებს ალერგიის მართვის პრაქტიკის ცალკე, თვალსაჩინო შეფასებაც ჰქონდეთ, რათა მომხმარებლებმა წინასწარ იცოდნენ, რამდენად უსაფრთხოა მათთვის კონკრეტულ კაფეში ან რესტორანში საკვებისა და სასმლის შეკვეთა.
