10 წლის ბიჭი, რომელსაც გუშინ გურიაში მატარებელი დაეჯახა, ქუთაისის კლინიკაში სტაბილურად მძიმე მდგომარეობაში იმყოფება – “ინფო იმერეთის” ინფორმაციით, არასრულწლოვანი პაციენტი “დასავლეთ საქართველოს სამედიცინო ცენტრშია” მოთავსებული.
შემთხვევა გუშინ გურიაში, ლანჩხუთის მუნიციპალიტეტის სოფელ ნიგვზიანში მოხდა. როგორც ნიგვზიანში მერის წარმომადგენელმა, ირაკლი გუჯაბიძემ მედიასთან თქვა: “რკინიგზის ლიანდაგზე გადადიოდა [ორი მოზარდი]. გოგონამ გადაასწრო, ბიჭმა კი გადასვლა ვეღარ მოასწრო და მატარებელი დაეჯახა. […] საკმაოდ მძიმე დაზიანებები აქვს და ქუთაისის კლინიკაში გადაიყვანეს. მეექვსე კლასის მოსწავლე ბავშვია. შემთხვევა დღეს, დღის პირველ ნახევარში მოხდა”.
როგორც მთავარს შსს-ში უთხრეს, მომხდარზე გამოძიება სისხლის სამართლის კოდექსის 275-ე მუხლის მეორე ნაწილით დაიწყო, რაც რკინიგზის მოძრაობის უსაფრთხოების ან ექსპლუატაციის წესის დარღვევას გულისხმობს იმ ადამიანის მიერ, ვისაც ამ წესის დაცვა სპეციალურად ევალება, რამაც ჯანმრთელობის ნაკლებად მძიმე ან მძიმე დაზიანება გამოიწვია.
