ნიკოლოზ კვარაცხელიას შეკვეთით, ჯგუფურად განზრახ მკვლელობის ორგანიზების საქმის პროკურორის, გია შაიშმელაშვილის ინფორმაციით, ბრალდებულ ბუსა ჟვანიას ოფიციალურად ქვეყნიდან არ არის გასული.
ამის შესახებ მან “ფორმულას” ეთერში განაცხადა.
კითხვაზე, არის თუ არა მათთვის ცნობილი ჟვანიას ადგილსამყოფელი, ამბობს, რომ “არა”.
“ბუსა ჟვანია ოფიციალურად ქვეყნიდან გასული არ არის და მე არ ვიცი სად არის” – ამბობს პროკურორი.
ცნობისთვის, თბილისის საქალაქო სასამართლომ ნიკო კვარაცხელიას შეკვეთით, ჯგუფურად განზრახ მკვლელობის ორგანიზებაში ბრალდებულ, ბესარიონ (ბუსა) ჟვანიას დაუსწრებლად შეეფარდა პატიმრობა.
გია შაიშმელაშვილმა პროცესის შემდეგ თქვა, რომ ბუსა ჟვანია დანაშაულის ჩადენის პერიოდში იმყოფებოდა ნასამართლეობის მდგომარეობაში. პროკურორის განმარტებით, იგი ახალი გათავისუფლებული იყო სასჯელაღსრულების დაწესებულებიდან, როდესაც, ბრალდების ვერსიით, ახალი დანაშაული დაგეგმა — “ზაფხულში გათავისუფლებულმა, სექტემბერში განზრახ მკვლელობა დააორგანიზა”.
პროკურატურის ცნობით, გურამ და დავით კაკულიებმა ნიკოლოზ კვარაცხელიას შეკვეთით მკვლელობის განზრახვა მათ მეგობარს ბესარიონ ჟვანიას გაანდეს და შეთანხმდნენ მოეხდინათ ნიკოლოზ კვარაცხელიას მკვლელობის ორგანიზება. ბესარიონ ჟვანიამ დაიწყო დანაშაულის ამსრულებლის მოძიება, რა მიზნითაც იგი მის ნაცნობებს ალეკო ჭელიძეს და გიორგი კავილაძეს დაუკავშირდა, შესთავაზა მათ ძმები კაკულიების შეკვეთით მოეხდინათ ნიკოლოზ კვარაცხელიას ჯგუფური მკვლელობა, რაზედაც ისინი დათანხმდნენ. ალეკო ჭელიძე და გიორგი კავილაძე ბესარიონ ჟვანიას ორგანიზებით, 2021 წლის ივლისსა და აგვისტოში სომხეთის რესპუბლიკაში რამდენჯერმე გაემგზავრნენ ამავე ქვეყანაში მყოფი მკვლელობის შემკვეთებთან გურამ და დავით კაკულიებთან შესახვედრად, სადაც ისინი მკვლელობის ორგანიზებისათვის აუცილებელ მითითებებს გასცემდნენ.
