მომავალ წელს საჯარო სკოლებში დასაქმებულების ნაწილი 20%-ით გაზრდილ ანაზღაურებას მიიღებს. როგორც 2026 წლის ბიუჯეტის პროექტის მესამე გადამუშავებულ ვარიანტშია აღნიშნული, ანაზღაურება გაეზრდებათ სკოლების ადმინისტრაციულ პერსონალს, სკოლის ექთნებს და მანდატურებს.
„სკოლამდელი და ზოგადი განათლების ბიუჯეტი იქნება 1.923 მლრდ ლარი, რაც პროექტის წინა ვერსიით განსაზღვრულ თანხას 37,1 მლნ ლარით აჭარბებს. გაზრდილი დაფინანსების ფარგლებში, საპარლამენტო განხილვების დროს დაყენებული წინადადებების შესაბამისად გათვალისწინებულია საჯარო სკოლების ადმინისტრაციული პერსონალის, სკოლის ექთნების და მანდატურების ხელფასების 20%-იანი ზრდა, ნაცვლად მანამდე განსაზღვრული 10%-ისა“ – წერია ბიუჯეტის პროექტის განმარტებით ბარათში.
რაც შეეხება პედაგოგებს, როგორც ცნობილია 2026 წელს მასწავლებლების ხელფასების ზრდა დაგეგმილი არ არის.
